قال الدكتور معتز عبد الفتاح، أستاذ العلوم السياسية، إن 29 يونيو هذا العام يشهد المزيد من الافتتاحات والإنجازات التي تحققها الدولة المصرية، ما يؤكد أن المسيرة لا تتوقف، متابعا: “الناس كل يوم بتشعر إن في جديد، أه في تحديات ومشاكل وصعوبات، بس في إرادة قوية، وقيادة راغبة في أن تنهض بمصر وتدفعها للأمام”.
وأضاف عبد الفتاح، خلال تقديمه برنامج “90 دقيقة” عبر فضائية “المحور”، “الرؤساء اللي قبل السيسي جاملونا على حسابنا، الرئيس عبدالناصر أعاد توزيع الدخل والثروة وادى الفقراء وعمل كل شيء ببلاش، والناس وقتها سقفت وشعبية الرئيس زادت ويوم ما مات جنازته محصلش زيها، لكن في النهاية مين اللي دفع الثمن؟ ميزانية الدولة لا تتحمل ذلك، سهل أوي إني أكل ابني شيكولاتة كل يوم، والواد هيحبني جدا، لكن بعد شوية الواد هيجيله تسوس، وبطنه هتوجعه، وهيجيله أمراض، أنا كده بعمل اللي مصلحته ولا اللي فيه مصلحتي أنا؟ مين اللي هيشيل الشيلة ويدفع الفاتورة في الآخر؟ وفعلا لقينا نفسنا في الآخر بنتجامل على حسابنا”.
تابع: “الرئيس السادات ملحقش أوي لأن ملف تحرير الأرض هو اللي كان مسيطر على فترته، وبعدها الرئيس مبارك 30 سنة رفع شعار سيبها زي ما هي، شوية ناس أغنياء وشوية ناس فقراء وغلابة وربنا خلقنا درجات وسيب كل حاجة زي ما هي.. أما الرئيس السيسي رئيس شجاع، مش بيجاملنا على حسابنا، قال من الأول عايزينها بلد قد الدنيا شيلوا معايا الشيلة، هتشيلوا معايا الشيلة هننجح، اللي إحنا بنشوفه رئيس مش حريص على شعبيته”.