قالت الإعلامية سهير جودة، إنها تحب أن تعمل أكثر من شيئ في وقت واحد، مشيرة أنها تؤمن أن المرأة شبكية والرجل صندوق، فأنا امارس رياضة المشي في الصباح، وأحب القراءة والكتابة جدا، وأباشر في نفس التوقيت مهام المنزل.
وأضافت سهير في برنامجها الذي يحمل اسم «الستات»، والمذاع عبر فضائية «النهار»، أنها تمارس حياتها بشكل طبيعي بعد الإنتهاء من الحلقة، بالرغم من الإجهاد الكبير الذي تتعرض له، تقوم بالذهاب لمناسبات أصدقائها وتلبي دعوتهم، قائلة: «في واجبات الواحدة لازم تعملها، سواء كان واجب عزاء او زيارة مريض، وفي حاجات بتبسطني وبتغيرلي مودي، خصوصا لو أنا رايحة مهرجان الموسيقى العربية، او رايحة الاوبرا».
وأكدت سهير انها تهتم بالتفاصيل اكثر من الصورة العامة للمواقف والاشياء، قائلة: «بهتم بالتفاصيل في الشغل جدا، ولو حد كلمتي وقالي فلانة خست او تخنت مباخدش بالي خالص، واعرف المواضيع بس مقعدتش اركز في تفاصيله، لكن في الشغل باهتم بكل تفاصيله».
وتابعت: «انا بشتغل من وانا عندي ١٦ سنة فكل تكويني وتفكيري في الدقة، لان وقتها كنت بشتغل في روزاليوسف والاذاعة، ومكنش ينفع يبقى في نسبة خطأ».
وأشارت سهير: « قدوتي في الحياة ناس كتير اولهم ابويا طبعا، ولكن في حياتي المهنية قدوتي فاطمة يوسف صاحبة روزاليوسف، لانها كانت ست متعلمتش لكن كانت مثقفة اكتر من اي حد مثقف كانت بتقدر يبقى في بينها وبين اي شخصية مهمة تقدر تكون ند قدامه، وعملت مجلة وعملت مؤسسة وكانت ممثلة مسرح، وبعدين تفرغت للصحافة، وصنعت نجوم منهم احمد بهاء الدين وانيس منصور، وللاسف مشوفتهاش ولا مرة».
