زيزي عادل لوالدها: شلت من عليك حمل كبير.. وسألت وعرفت إنك بتتباهي بيا بين الأموات

وجهت المطربة المعتزلة زيزي عادل، رسالة لوالدها الذي توفى منذ 10 أعوام، تعبر من خلالها عن اقتناعها التام برضا والدها عنها في تربته بعد اعتزالها الفن وارتدائها الحجاب.

وكتبت زيزي عبر حسابها الرسمي بموقع التواصل الاجتماعي “فيسبوك”: “كان نفسي تكون موجود يا حبيبي وتفرحلي وتدعيلي زي كل الناس ما دعيتلي واشوفك وانت مبسوط وبتتباها بيا قدام الناس وانا سألت وعرفت إنك دلوقتي بتتباهي بيا بين الأموات وطول منا ربنا راضي عني وببعد عن أي فعل يغضبه فأنا بخير وانت كمان بخير يا حبيبي”.

وأردفت: “عارفه اني شلت من عليك حمل كبير…١٠سنين من غير ما اشوفك يا بابا وحشتني.. وحشني اسمع صوتك واتكلم معاك، ربنا يرحمك ويغفرلك و يعفو عنك يا حبيبي يا بابا الي ان نلتقي في الجنه بإذن الله، ارجو الدعاء لأبي في هذه الأيام المباركه فضلا وليس امراً”.

سبب اعتزال زيزي عادل الغناء

من جانبها، أعلنت الفنانة زيزي عادل اعتزالها الغناء بشكل نهائي مؤكدة انها سوف ترتدي الحجاب وتريد أن تموت وهي غير عاصية لربها .

وقالت زيزي في فيديو لها عبر حسابها بانستجرام “أنا النهاردة طالعة أقول خبر مهم أخدته في حياتى وهو قرار اعتزالى”.

وأضافت زيزى عادل: “قررت أسيب مهنة المطربة والقرار أنا مخدتهوش امبارح أنا وخداه من فترة كبيرة جدا، بس يمكن مطلعتش قلت وقتها لأنى كنت حابة أتكلم مع نفسى ومع الناس القريبة أوى”.

وتابعت: “الناس القريبة منى عارفين نفسهم ولما قلتلهم على القرار شجعونى ودعمونى كمان، ويمكن قرار الاعتزال ده بيبعدنى عن أكتر مغريات الحياة وهى الشهرة والأضواء”.

واردفت: “أنا ببعد عن الفن عشان بقرب من ربنا، والفترة اللى فاتت قربت من ربنا جدا، ولقيت ان القرآن بيقولى إنى لازم أكون ست ملتزمة، وبحاول على قد ما بقدر أكون ملتزمة وهتستغربوا شوية انى طالعة بشعرى ومش محجبة، ويمكن ده لأنى لسه ربنا لم ينعم عليا بالحجاب، وبدعى ربنا يتممها عليا، وكل حاجة بتيجى خطوة خطوة ومفيش حاجة بتيجى مرة واحدة”.

وواصلت زيزي عادل: ”أنا عاوزة أقول كمان الفن هو مصدر دخلى ورزقى، وأنا بسيب حاجة بعيش منها وسيبتها وعارفة إن ربنا هيرزقنى، وأنا راضية جدا عن قرارى ومبسوطة جدا بيه وحابة اللى جاى جدا وحاسة إن حياتى اختلفت تماما”.

وأضافت: “يمكن لما أخدت القرار تعرضت لمواقف واللى تسمى اختبار من ربنا وكان اختبار صعب والإنسان ضعيف، لأن جالى عرض مجاليش وأنا بمارس مهنة الغناء، ولكن الحمد لله ربنا كرمنا وقدرت ارفض من دعم من ناس حواليا”.

وتابعت: “أنا مش عاوزة أدخل في حتة إن الفن حلال والفن حرام، عشان مبقاش طالعة إنى داعية أنا طالعة بتكلم عن نفسى، وإنى بطلت أغنى ودينى بيقولى كده وكل واحد حر في حياته”.

واختتمت زيزي عادل حديثها: “أنا حابة أموت وربنا راضى عنى ويمكن دى حاجة كلنا بنتمناها، فأنا مش عارفة هاموت امتى ولكن كل اللى عوزاه أكون مستعدة لمقابلة ربنا وأقابله وأنا راضية عن نفسى وحياتى وأفعالى، والحمد لله ربنا كرمنى والتزمت، وربنا يكرم التزم اكتر وادعولى ان ربنا يثبتنى على اللى انا فيه”.