استنكر الإعلامي عمرو أديب، الهجوم على منى زكي بعد طرح بوستر مسلسلها الجديد تحت الوصاية المقرر أن يعرض في الموسم الرمضاني المقبل 2023، إذ انتقد البعض ظهورها بحواجب ثقيلة.
وقال عمرو أديب في برنامجه الحكاية: الناس بتقول ليه المحجبة وحشة كانوا عاوزينها محجبة قمر، أنت عارف هي بتلعب دور إيه أصلا؟ هو إيه محاكم التفتيش دي، هو إحنا هنعمل دراما أن فيه راجل خير اتجوز واحدة خيرة وجابوا عيال خيرين وطلعوا للمجتمع وعملوا اختراعات والمجتمع وقف جمبهم ونهاية الفيلم كل المجتمع أخيار إيه الدراما دي؟.
وأضاف عمرو أديب: الدراما دورها إنها تدق ناقوس الخطر وتحل مشكلة وقانون عاوز يتغير، فيبدأ المجتمع يتكون جواه عقل جمعي لمشكلة، زي مسلسل أريد حلا لفاتن حمامة هو ده اللي عمل حالة مش مقالة ولا برنامج.
وأردف أديب قائلا: بلاش يكون فيه دراما في البلد؟، ده المسلسل ما صوروش فيه إلا حلقتين، خلونا نواجه نفسنا، أنتم عارفين إيه سبب الدوشة اللي مع منى زكي، ده لأن فيه ناس مستكترة على منى زكي إنها تعمل دور بالحجاب، هي غلطت في مين ولا ضايقت مين ولا عملت مشكلة مع مين؟، اهدوا شوية وارد وجايز الحوادجب دي تعجبك، أنا مستغرب إحنا واصلين لمرحلة الحواجب هي لازم تطلع وحشة يعني ولو طلعت حلوة وعاملة حواجبها هيتقال هو في محجبة هتعمل حواجبها كده، هو إيه شغل كيد النسا ده؟.
مسلسل نيوتن كان خارقًا ومنى زكي ممثلة جبارة
وواصل عمرو أديب: مسلسل نيوتن كان خارق للعادة وفاخر، ومنى زكي ممثلة جبارة، هو أنتم عاوزين نعملها مبسترة ودراما خالية الدسم، ده إحنا بنشوف كل يوم قتلة في الأسعار والنصب والكذب وبنشوف نماذج لحاجات مشوهة وإلا كانت الدنيا حلوة.
ما يحدث مع منى زكي ترصد وتوحش
واختتم عمرو أديب قائلًا: استنوا لما تشوفوا المسلسل ومن حقك تنتقد، إنما تنتقد حواجبها هذا ما لم نسمع به من قبل، ده ترصد واستقصاد وتوحش وأنتم عارفين أنتم بتعملوا إيه وعارفين أنتم بتعملوا كده ليه وبأمارة إيه وعلشان ايه ومحدش بيقول، لكن ده مش علشان الحواجب وكلنا عارفين.
