قالت النجمة جنات إن منتخب المغرب أو كما نسميهم أسود الأطلس كانوا رائعين، وفرحونا وشرفونا بكأس العالم، وفرحوا العرب كلهم،و”ديما مغرب” جملة بنرددها وقت أفراحنا الوطنية بالمغرب، وتعني المغرب للأبد، جاء ذلك خلال حوارها في سهرة غنائية خاصة على ميجا اف ام من تقديم خالد عليش.
وأضافت مجهزة مجموعة من الأغاني المختلفة، وهتنزل الفترة الجاية ورا بعض، واغنية “اللى بيني وبينك” كانت انطلاقتي بمصر، بس عملت قبلها أغنية “افهمنى حبيبي” مع وليد سعد.
وتابعت أغنية “اللى بيني وبينك” بعد ما سجلتها كان فاضل على نزول ألبومي 6 شهور، واتفاجئت إنها اتسربت بصوت عمرو دياب، فالشركة أخدت قرار إن الأغنية تنزل فورا قبل الألبوم.
أما بخصوص السوشيال ميديا، أول لما فهمت إن فيه ناس طبيعتها تدخل تقول تعليق غير مناسب، بقيت بتجاهل الكومنتات ومش بتضايق.
وعن اسمها “جنات” فقالت ساعات بحس إن ليا نصيب من اسمى، وأنا مع التنوع الموسيقي جدا، ومقدرش أسمع شكل واحد من المزيكا، عشان كده التنوع مطلوب.
وعلقت على أغاني المهرجات فقالت شكل المهرجانات موجود فى المغرب من زمان من أيام الراي، ومفيش أي انسجام بين شكل الأغاني بتاعتي والراب، بس هحب جدا لو قدمت دويتو راب مع أى فنان.
كما وضحت ما حبتش أوي أغنية “بحبك يا حبيبي” بس هى أكتر أغنية نجحت في ألبوم “اللى بيني وبينك”، عشان كده فهمت إن ده الشكل اللى الناس حبتني فيه، لكن أنا مش بغني رومانسي بس.
وعن عملت أغنية “حبيبي على نياته” فقالت عملتها كتجربة، ونجحت برضه، بس أنا مش مع الصداقة بين الراجل والست، والمعنى الصح بتاعها إني بتهكم على النوع ده من العلاقات.
وأما امنيتها في 2023 فقالت نفسي تبقى سنة أحسن على مستوى العالم كله، وعلى مستوى شغلي هتبقى بالنسبة لي عودة قوية إن شاء الله.
وعلقت أنا مش زوجة نكدية خالص، بنكد مرة بس في السنة، وعرضت روشتة للتعامل في أي مشكلة بين الزوجين وهي الصبر، بمجرد ما نهدى على المشكلة يوم، الدنيا بتعدي.
وردت على سؤال التمثيل فقالت اتعرض عليا عروض تمثيل كتير، وأكتر عمل حبيت أشارك فيه كان دور مطربة فى عمل فنى كبير، ولو مثلت دور مطربة هيبقى أسهل بالنسبة لي.
أعمال جنات القادمة
واختتمت قائلا بحب أسمع الراديو جدا فى العربية وبحب صوت المذيعين على ميجا اف ام، والأفراح والحفلات بالنسبة لي واحد، صحيح بحب الحفلات أكتر، لكن تفاعل الأفراح بحس بيه بشكل أكبر، و فى يناير 2023 هنزل أغنية مع الملحن محمد الصاوي، وهي أغنية صعيدي اسمها “التفاح والفراولة”.
