تحدث الفنان إسماعيل فرغلي عن موقف صعب، تعرض له، ومعاناته من ضيق الحال؛ قبل أن يفتح الله له باب رزق جديد، من خلال المشاركة في برنامج المقالب: حسين على الهوا، كما تحدث عن دعم زوجته له في هذه المحنة؛ إذ لم يكن يمتلك مالا من أجل شراء طعام لأسرته.
وقال الفنان إسماعيل فرغلي، خلال استضافته ببرنامج الستات، المذاع عبر قناة النهار، حول كواليس مشاركته في برنامج حسين على الهوا: كان فيه قصة في اليوم ده، في اليوم اللي جالي فيه برنامج حسين ع الهوا؛ كانت بنتي نرمين دي لسه في كي جي وان، وخلاص في اليوم ده مكنش معايا جنيه في جيبي، قعدت أنا ومراتي ندور في البيت كله على أي فلوس، جنيه أو نص جنيه أو حتى ربع؛ لحد ما جمعنا بالعافية تمن علبتين كشري، أقسم بالله.
وتابع حديثه عن برنامج حسين على الهواء، وكواليس ترشحيه للعمل، باكيًا،: جبنا علبتين كشري، سيبنا واحدة للبنت، وقعدت أنا ومراتي ناكل في العلبة التانية، وهي في نص العلبة؛ تقول: الحمد لله، عشان تسبيلي الباقي أكله، وقاعدة تطمني، وتقولي إن شاء الله ربنا هيكرمنا، وفي الوقت ده؛ يرن تليفون برنامج حسين ع الهوا، كان التليفون لما يرن؛ أطلع اجري عليه، عشان مفيش رصيد معايا أكلم حد من عندي، المهم، قالولي عايزينك في مكتب طارق نور، في شارع نوال، وأنا في آخر البحر الأعظم.
إسماعيل فرغلي: فرَّحت مراتي وقلت لها ربنا سمع دعاكي وكرمنا
واختتم إسماعيل فرغلي حديثه عن كرم الله له، قائلا: نزلت طبعا مش معايا فلوس آخد تاكسي، ووصلت المكتب، ومضيت العقد، وخدت عربون 200 جنيه؛ كانوا رقم وقتها، رجعت البيت وفرحت مراتي، وقلت لها: ربنا سمع دعاكي وكرمنا، قالتلي إيه اللي حصل، قلت لها: هنطلب كمالة.
